„Ég fékk að búa eitthvað til sem ég er stolt af“ Að kenna ritlist í framhaldsskóla

Tilgangurinn með þessu verkefni var að safna saman ritlistaræfingum fyrir framhaldsskóla. Sumar samdi ég en aðrar eru þýddar og jafnvel staðfærðar. Hluti af æfingunum var lagður fyrir nemendur á fyrsta ári í framhaldsskóla haustið 2018 á þriggja vikna tímabili. Hverri æfingu fylgir ígrundun um kennsluna og þar sem ég glímdi sjálf við æfingarnar ásamt nemendum, fylgja textarnir mínir með sem og útvalin verkefni frá nemendum. Ég viðaði að mér heimildum um ritun í framhaldsskólum til að svara því hvort efla þurfi ritunarkennslu og hver tilgangurinn með henni sé. Auk þess aflaði ég mér upplýsinga um aðferðir við ritunarkennslu og endurgjöf. Loks lagði ég könnun fyrir nemendur til að meta gagnsemi ritlistaræfinganna. Hér var gerð tilraun til að auka vægi ritunar með því að leggja fyrir stutt skapandi verkefni og ýmsar ritlistaræfingar sem ganga út á að leika sér að tungumálinu. Af viðbrögðum nemenda að dæma tókst vel til. Nemendur höfðu langflestir gaman af því að skrifa og það var augljóst að þeim var annt um textana, sína eigin hugarsmíð. Þeir mátu það flestir sem svo að þeim hefði farið fram í ritun. Með sköpun og tjáningu fylgir lærdómur. Flestum ber saman um að íslenskir nemendur þurfi bæði meiri ritunarkennslu og fjölbreyttari. Ekki er hægt að álasa nemendum fyrir lélega ritfærni þegar komið er í háskóla ef þessum mikilvæga námsþætti er ekki sinnt nógu vel á fyrri stigum. Það liggur í augum uppi að sá sem getur tjáð sig í rituðu máli af öryggi á auðveldara með að fóta sig í nútímasamfélagi. Í því felst valdefling